अर्घाखाँची । भूमिकास्थान नगरपालिका वडा नं. ९ सान्डेभामा रहेको चुनढुंगा सञ्चालनको लागि भूगर्भ विभागमा नगरले पठाएको पत्रमा हस्ताक्षर, लेटरप्याड तथा छाप किर्ते भएको घटनाको छानविन गरी दोषी सार्वजनिक गर्न राष्ट्रिय स्वतन्त्र पाटी अर्घाखाँचीले माग गरेको छ ।
रास्वपा अर्घाखाँचीले एक विज्ञप्ति जारी गर्दै यस्तो माग गरेको हो । नेपालको मुलुकी ऐन बमोजिम सरकारी छाप, लेटरप्याड तथा हस्ताक्षर दुरुपयोग दण्डनीय रहेको भनी व्यवस्था गरेको भएपनि उक्त किर्ते कागज तयार पार्ने कार्यमा संलग्न रहेकाहरूको पहिचान तथा दण्डको सम्बन्धमा पालिकाले सक्रियता नदेखाउनुले थप संशय उत्पन्न गरेको रास्वपाको ठहर छ ।
“उक्त कार्यमा संलग्नको पहिचान गरी अविलम्व कारवाहीको लागि जोडदार माग गर्दछौँ ।” विज्ञप्तिमा भनिएका छ, “जिल्लाकै बदनाम हुनेगरि, समग्र पालिकावासीको चरित्र हत्या हुनेगरि भएको उक्त अपराधको घटनाले समग्र हामी जिल्लावासीहरूको शिर निहुरिएको छ ।”
घटनाको छानविन गरी दोषीलाई कारवाहीको लागि पहल गर्न ढिलाई गरेको भन्दै पालिकाकै संस्थागत हात रहेको त छैन भन्ने आशंका गर्ने ठाउँ दिएको रास्वपाले जनाएको छ ।
