रुसको नियन्त्रणमा रहेका युक्रेनी भूमिलाई रुसमा गाभ्ने विषयमा आजबाट जनमत–संग्रह सुरु भएको छ । पाँच दिनसम्म हुने यस चुनावलाई कियभले अवैध बताएको छ । मतदाताले आफू बसेको भूमि रुसमा गाभ्ने वा नगाभ्ने दुईमध्ये एक विकल्प छान्न पाउनेछन् ।
जनमत–संग्रह भइरहेका लुहान्स, दोनेत्स, खरसन र जपोरिझिया क्षेत्रले युक्रेनी भूमिको झण्डै १५ प्रतिशत हिस्सा ओगट्छ । यीमध्ये लुहान्स र दोनेत्स्क क्षेत्रको ठूलो हिस्सामा सन् २०१४ देखि मस्को–समर्थित पृथकतावादीको नियन्त्रणमा थियो । दक्षिण खोरसन र जपोरिझिया भने पछिल्लो सात महिनामा रुसले कब्जामा लिएको हो ।
(आज)सेप्टेम्बर २३–बाट सुरु भएको मतदान सेप्टेम्बर २७ सम्म जारी रहनेछ । चार प्रान्तमा हुने मतदान प्रक्रिया कागजी मतपत्रमा हुनेछ । ‘छोटो समयमा तयारी गर्नुपरेको र प्राविधिक उपकरणको कमीका कारण विद्युतीय मतदान गर्न सकिएन,’ रुसी समाचार एजेन्सी तासले लेखेको छ ।
सुरुका चार दिनमा अधिकारीहरु मत संकलन गर्नका लागि घर–घर जानेछन् भने अन्तिम दिनमा मात्र मतदान केन्द्रमै गएर मत हाल्नुपर्नेछ । यी चार क्षेत्रमा रुसले नियुक्त गरेका अधिकारीहरु सामूहिक रुपमा गत मंगलबार जनमत–संग्रहको घोषणा गर्ने योजना सार्वजनिक गरेका थिए ।
युक्रेनले प्रत्याक्रमण तिव्र पार्दै रुसको कब्जामा रहेको जमिन फिर्ता लिन थालेपछि यस्तो निर्णय लिइएको आशंका गरिएको छ । युक्रेन र उसका पश्चिमी मित्र शक्तिले यस निर्वाचनको परिणाम स्वीकार नगर्ने बताएका छन् । विश्लेषकहरुले कुनै स्वतन्त्र अवलोनकर्ताबिना गरिएको यस जनमत–संग्रहको परिणाम रुसको पक्षमा आउने निश्चितजस्तै रहेको बताइरहेका छन् ।
जनमत–संग्रहपछि यो क्षेत्र रुसको नियन्त्रणमा आउने भएकाले त्यसपछि यी क्षेत्रमा हुने आक्रमण रुसी भूमि माथिको आक्रमण मानिनेछ । त्यसपछि रुसले अहिलेजस्तो संयमित लडाई गडिरहनुपर्ने छैन ।
