- कपिलवस्तुको मर्यादपुर नाकाबाट बैशाख महिनामा १० लाख बढीको अवैध सामान बरामद गरिएको छ।
- सशस्त्र प्रहरीले चोरी पैठारी नियन्त्रण गर्न सीमा क्षेत्रमा गस्ती र निगरानी तीव्र बनाएको छ।
- बरामद गरिएका खाद्यान्न र लत्ताकपडा लगायतका सामग्रीहरू सुठौली भन्सार कार्यालयमा बुझाइएको छ।
कपिलवस्तु : कपिलवस्तु जिल्ला स्थित सशस्त्र प्रहरी बल वेश क्याम्प डेगरी मर्यादपुर बोर्डर आउट पोष्ट (बीओपी) ले सीमा नाकामा हुँदै अवैध रुपमा नेपाल भित्राइएका १० लाख भन्दा बढी मूल्यका समानहरु बरामद गरेको छ । बैशाख महिनाभरि चोरी तस्करी गरेर भित्राइएका सामग्रीहरू बरामद गरि भन्सार बुझाइएको हो ।
मर्यादपुर खुनुवा भारतसंग जोडिएका सीमावर्ती क्षेत्रमा हुने अवैध चोरी तस्करी तथा भन्सार छली नियन्त्रण अभियानलाई तीव्र बनाउदै सशस्त्र प्रहरीले खाद्यान्न, लत्ता कपडा, हार्डवेयर, ईलेक्ट्रिक, फलफुल र किराना लगायतका सामान बरामद गरेको हो । सीमा क्षेत्रमा कडा जाँच गर्दै गस्ती र आकस्मिक चेकिङले एक महिना नपुग्दै उक्त परिणामका सामग्रीहरू बरामद गरिएको डंगरी बिओपीका प्रमुख सशस्त्र निरीक्षक हरित बडुवालले बताए ।
सो बरामद सामाग्रीहरु सुठौली भन्सार कार्यालय बुझाइएको थियो । साढे ४ महिनामा साढे २३ लाख भन्दा बढीका भन्सार छली भित्राइएको अवैध समान बरामद गरेर भन्सार बुझाएको उनले बताए । सीमा क्षेत्रमा पछिल्लो समय अवैध आयात तथा राजस्व छलीका गतिविधि बढ्दै गएपछि सशस्त्र प्रहरीले थप निगरानी बढाएको हो ।
विशेषगरी रातिको समयमा विभिन्न नाका प्रयोग गरी अवैध सामानहरु भित्राउने हुँदा गस्ती तथा चेकिङलाई प्रभावकारी बनाइएको बडुवालले बताए । सशस्त्रले आगामी दिनमा सीमा क्षेत्रमा निगरानी अझ प्रभावकारी बनाउँदै अवैध चोरी तस्करी नियन्त्रण अभियानलाई निरन्तरता दिने जनाएको छ ।
