अर्घाखाँची । पाणिनि गाउँपालिकाले आगामी आर्थिक वर्ष २०८२/८३ का लागि कुल ७२ करोड २० लाख ७४ हजार ५ सय रुपैयाँ बराबरको बजेट सार्वजनिक गरेको छ। गाउँपालिका उपाध्यक्ष नर्मदा गौतम पौडेलले असार ८ गते प्रस्तुत नीति तथा कार्यक्रमको आधारमा यो बजेट गाउँसभामा पेश गरेकि हुन्।
गाउँपालिकाले यसपटक कृषि, धार्मिक पर्यटन र रोजगारी सिर्जनालाई बजेटको प्रमुख प्राथमिकतामा राखेको छ। दिगो भौतिक पूर्वाधार निर्माण, गुणस्तरीय शिक्षा र स्वास्थ्य सेवामा सुधार, सामाजिक सुरक्षा, वातावरण संरक्षण, विपद् व्यवस्थापन र स्थानीय स्रोत साधनको सन्तुलित विकासलाई पनि बजेटले उच्च महत्व दिएको छ। यसका साथै, गुणस्तरीय सार्वजनिक सेवा प्रवाह र सुशासन प्रवर्द्धनमा समेत गाउँपालिकाले जोड दिएको छ।
बजेटमा प्रत्येक वडाका लागि ४० लाख रुपैयाँको सिलिङ तोकिएको छ, जसले स्थानीयस्तरमा विकास निर्माणका कार्यलाई थप गति दिने अपेक्षा गरिएको छ। पाणिनी गाउँपालिकाको यो बजेटले समग्र क्षेत्रको सन्तुलित विकास र जनताको जीवनस्तर सुधारमा महत्वपूर्ण भूमिका खेल्ने विश्वास गरिएको छ।
